Нийгмийн даатгалын багц хуулийн шинэчилсэн найруулгаар  өндөр насны тэтгэврийг тогтоохдоо шимтгэл төлсөн байвал зохих доод хугацааг жил бүр гурван сараар сунгахаар болсон. Жишээ нь энэ жил 60 настай эрэгтэй, 55 настай эмэгтэй тэтгэвэр тогтоолгохдоо хамгийн багадаа 21 жил 9 сар шимтгэл төлсөн байх юм. Харин ирэх жил буюу 2025 онд 22 жил, 2026 онд 22 жил 3 сар болно. Энэ мэт байдлаар “сунгаж” явсаар 2037 он гэхэд шимтгэл төлсөн байвал зохих доод хугацаа 25 жил болно. Тодруулбал, 1977 онд төрсөн эрэгтэй 60 насандаа буюу 2037 онд тэтгэвэр тогтоолгохдоо  шимтгэл төлсөн байвал зохих доод хугацаа нь 25 жил байх юм. Гэхдээ даатгуулагч та хаана, ямар нөхцөлд ажил хөдөлмөр эрхэлж байснаас хамаарч, тэтгэвэр тогтоолгох нас наашилна. Жишээ нь Газрын доор болон хөдөлмөрийн хортой, халуун нөхцөлд 10-аас доошгүй жил ажиллаж шимтгэл төлсөн эрэгтэй 50 насандаа, 7.6-аас доошгүй жил ажиллаж шимтгэл төлсөн эмэгтэй 45 насандаа тэтгэвэр тогтоолгох эрхтэй. Мөн Хөдөлмөрийн хүнд нөхцөлд 12.6-аас доошгүй жил ажиллаж шимтгэл төлсөн эрэгтэй 55 насандаа, 10-аас доошгүй жил ажиллаж шимтгэл төлсөн эмэгтэй 50 насандаа тэтгэвэрт гарах боломжтой. Үүнээс гадна малчдын хувьд  эрэгтэй нь 55, эмэгтэй нь 50 насандаа тэтгэвэр тогтоолгох боломжтой болох юм.