Төрийн байгууллагуудаас анх удаа Нийгмийн даатгалын ерөнхий газар ISO 9001:2008 олон улсын стандартад нийцсэн чанарын удирдлагын тогтолцоог нэвтрүүлж байгаа билээ. Энэ хүрээнд 3 дугаар сарын 03-ны өдөр Чанарын удирдлагын тогтолцоог хэрэгжүүлэх удирдах хороо нь орон нутгийн Нийгмийн даатгалын хэлтсүүдтэй телефон хурал хийлээ. Хуралд Нийгмийн даатгалын хэлтсүүдийн удирдах ажилтнуудаас гадна Удирдах хорооны гишүүд, ажлын дэд хэсгийн ахлагч нар, чанарын менежер болон Монголын бүтээмжийн төвийн зөвлөхүүд оролцов. Энэ үеэр шинээр батлагдсан тушаал шийдвэрүүдийг танилцуулж, 2014 онд ISO нэвтрүүлэх чиглэлээр хийгдсэн ажлуудыг тайлагналаа. Энэхүү стандартыг эхний ээлжинд НДЕГ, Хан-Уул дүүргийн нийгмийн даатгалын хэлтэс, Дорнод аймгийн нийгмийн даатгалын хэлтсүүдэд тус тус хэрэгжүүлж байгаа ба хурлын үеэр дээрх байгууллагууд хийж хэрэгжүүлж буй ажлаа бусад хэлтсүүддээ тайлагнасан юм. Монголын бүтээмжийн төвийн зөвлөх Б.Уранчимэг хэлэхдээ “Бид алдаа гарсны дараа л анхаарал хандуулдаг, гэсэн ч хаанаа хэн алдав гэдгийг тодорхойлж чаддаггүй. Харин энэхүү стандартыг “нутагшуулж” чадвал алдаа гарахаас урьдчилан сэргийлэхээс гадна нэгэнт алдаа гарсан тохиолдолд аль орц, процесст алдаа гарав гэдгийг шууд тодруулах боломж бүрдэх юм. Өөрөөр хэлбэл чанарын удирдлагын тогтолцоог нэвтрүүлснээр дотоод хяналт сайжрах, ажлын бүтээмж нэмэгдэх, үйлчилгээний чанар сайжрах, даатгуулагчийн сэтгэл ханамж дээшлэх, төсвийн зарцуулалт үр ашигтай хийгдэх зэрэг олон үр дүн гарна” гэв.
Хэдийгээр сонгогдсон гурван газар, хэлтэс дээр нэвтрүүлж байгаа ч цаашид бүх хэлтэс чанарын удирдлагын тогтолцоог нэвтрүүлэх учраас тэднийг ч бас мэдээлэл, зааварчилгаа, сургалтаар хангахыг зорьж ажиллаж байгааг Удирдах хорооноос мэдээлсэн. Тухайлбал, Дорнод аймагт сургалт хийхдээ Дархан, Сэлэнгийн нийгмийн даатгалын ажилнуудыг хамруулсан бол тун удахгүй Дархан, Сэлэнгэ, Хэнтий, Сүхбаатар аймгуудад сургалт зохион байгуулахаар төлөвлөж байна. Мөн 2015 оны 3 дугаар сарын 11-ний өдөр болох Удирдах ажилтны зөвлөгөөний үеэр хэлтсүүдийн удирдах ажилтнуудыг сургалтанд хамруулахаар шийдвэрлэв.
