“ЭРҮҮЛ МЭНДИЙН МАГАДЛАЛЫН ҮЙЛ АЖИЛЛАГААГ БОЛОВСРОНГУЙ БОЛГОХ НЬ” СЭДЭВТ ЭРДЭМ ШИНЖИЛГЭЭНИЙ БАГА ХУРЛЫГ ЗОХИОН БАЙГУУЛАВ.
Нийгмийн даатгалын ерөнхий газрын даргын баталсан удирдамжийн дагуу мэндийн магадлалын төв зөвлөлөөс “Эрүүл мэндийн магадлалын үйл ажиллагааг боловсронгуй болгох нь” сэдэвт Эрдэм шинжилгээний бага хурлыг 2024 оны 12 дугаар сарын 04-ний өдөр Улаанбаатар хотод зохион байгуулав.
Тус хуралд Гэр бүл, хөдөлмөр, нийгмийн хамгааллын яам, Нийгмийн даатгалын ерөнхий газар, Анагаахын шинжлэх ухааны үндэсний их сургуулийн Нийгмийн эрүүл мэндийн сургууль, Булган, Сүхбаатар, Сэлэнгэ, Өвөрхангай аймгийн 30 орчим төлөөлөл танхимаар, аймаг, дүүргийн Эрүүл мэндийн магадлалын зөвлөлийн гишүүд, судлаачдын төлөөлөл 46 эмч, мэргэжилтэн цахимаар, нийт 70 гаруй эмч, мэргэжилтнүүд оролцов.
Эрдэм шинжилгээний бага хуралд “Эрүүл мэндийн магадлалын үйл ажиллагааг боловсронгуй болгох нь” сэдвийн хүрээнд 20 гаруй судлаач илтгэл ирүүлснээс шилдэг 6 илтгэлийг хэлэлцүүлэн шалгаруулав. Үүнд:
- Архангай аймгийн НДГ-ын магадлагч эмч Д.Отгонжаргал, Архангай аймгийн Нэгдсэн эмнэлгийн эмч Г.Буянхишиг нарын “Архангай аймгийн хүн амын 2023 оны осол гэмтлийн өвчлөл ба осол гэмтлийн шалтгаант хөдөлмөрийн чадвар алдалтын судалгаа” сэдэвт илтгэл нэгдүгээр;
- Сүхбаатар аймгийн НДГ-ын магадлагч эмч Х.Чаминчимэг, Сүхбаатар аймгийн Нэгдсэн эмнэлгийн эмч Э.Энхмаа, С.Алтанцэцэг, Л.Болортунгалаг нарын “Сүхбаатар аймгийн хөдөлмөрийн чадвар алдалтын өнөөгийн байдал, гэмтэл согогийн шалтгаант хөдөлмөрийн чадвар алдалтыг судалсан дүн” сэдэвт илтгэл хоёрдугаар;
- Мэргэжлийн өвчин судлалын газрын дотор, уушги судлалын эмч С.Ачиймаа, АШУҮИС-ийн Нийгмийн эрүүл мэндийн сургуулийн багш, АУ-ны магистр Ц.Сансарцэцэг, Хөдөлмөрийн аюулгүй байдал, эрүүл мэнд судлалын төвийн Мэргэжлийн өвчин судлалын статистикч их эмч, АУ-ны докторант Б.Шинэбилэг, АШУҮИС-ийн Нийгмийн эрүүл мэндийн сургуулийн Орчны эрүүл мэндийн тэнхимийн багш, АУ-ны доктор С.Мягмарчулуун нарын “Мэргэжлээс шалтгаалсан өвчний улмаас хөдөлмөрийн чадвар алдсан иргэдийн сэргээн засах тусламж, үйлчилгээний зарим асуудлууд” сэдэвт илтгэл гуравдугаар байр тус тус эзлэв.
Эрдэм шинжилгээний бага хурал нь эрүүл мэндийн магадлалын үйл ажиллагаанд тулгарч буй бэрхшээлүүдийг танилцуулж, шийдэл боловсруулах, мэдээлэл солилцох замаар иргэдэд үзүүлэх үйлчилгээний чанар, хүртээмжийг сайжруулах, салбар дундын уялдаа холбоог нэмэгдүүлэх, бодитой үр дүнд хүрэх боломжийг бүрдүүлснээрээ ач холбогдолтой болов.
ЭРҮҮЛ МЭНДИЙН МАГАДЛАЛЫН ТӨВ ЗӨВЛӨЛ
