Нийгмийн даатгалын ерөнхий газраас хилийн чанадад оршин суугаа Монгол улсын иргэдийнхээ нийгмийн баталгааг хангах зорилгоор нийгмийн даатгалын сайн дурын төрөлд цахимаар даатгуулах үйлчилгээг Төрийн банктай хамтран нэвтрүүлж байна. 2015 оны 12 дугаар сарын 04-ний өдөр шинэ үйлчилгээний албан ёсны нээлтийн үйл ажиллагааг зохион байгуулж хил дамнан хэрэгжих өргөн цар хүрээтэй үйл ажиллагааны анхны шанг татлаа. Нээлтийн ажиллагаанд Нийгмийн даатгалын ерөнхий газрын дарга Ц.Уртнасан, Төрийн банкны гүйцэтгэх захирал Д.Батсайхан, Төрийн банкны бизнес хөгжлийн газрын ахлах мэргэжилтэн Х.Энхжаргал болон Нийгмийн даатгалын төв орон нутгийн байгууллагын 50 гаруй ажилтан албан хаагчид оролцов.
Хилийн чанадад оршин суугаа Монголчуудынхаа хүсэлтээр, хэрэгцээ шаардлагад нийцсэн энэхүү үйлчилгээг нэвтрүүлснээр дэлхийн 38 улс оронд амьдран суугаа 100 гаруй мянган Монгол иргэний нийгмийн баталгаа хангагдах боломж бүрдэх юм. Засгийн газрын хэрэгжүүлэгч агентлаг Нийгмийн даатгалын ерөнхий газар нь, 830.0 мянга гаруй албан журмын, 185 мянга орчим сайн дурын даатгуулагчийг нийгмийн даатгалд хамруулж, нийгмийн даатгалын тухай хууль тогтоомжийг хэрэгжүүлэн ажиллаж буй бөгөөд хилийн чанадад оршин суугаа Монгол Улсын иргэд цахимаар нийгмийн даатгалд хамрагдахдаа сайн дурын төрөлд даатгуулах юм.
Энэхүү үйлчилгээнд хамрагдахдаа даатгуулагч өөрөө хилийн чанадад байгаа ч цахимаар өөрөө бүртгүүлж, гэрээлж, өөрөө төлбөрийн нөхцөлөө сонгож, төлж, мөн өөрөө шимтгэл төлөлтөө хянах боломжтой гэдгээрээ ихээхэн давуу талтай. Та бүхэн www.ndaatgal.mn вэб сайтад байрлах “Хилийн чанадад оршин сууж байгаа Монгол улсын иргэдийн сайн дурын нийгмийн даатгал” баннер дээр дарж нэвтрэн үйлчилгээтэй холбоотой мэдээ мэдээллийг авах, үйлчилгээнд хамрагдан даатгуулах боломжтой.
