ДАРГЫН ЗӨВЛӨЛИЙН ЭЭЛЖИТ ХУРАЛ БОЛЛОО
Нийгмийн даатгалын ерөнхий газрын даргын зөвлөлийн өргөтгөсөн хурал 2025 оны 03 дугаар сарын 20-ны өдөр болж, 21 аймаг, 9 дүүргийн Нийгмийн даатгалын газрын дарга нар цахимаар оролцлоо. Хуралд НДЕГ-ын Хяналт, шалгалтын газраас Багахангай дүүргийн нийгмийн даатгалын газарт хийсэн хяналт шалгалт, илэрсэн зөрчил, цаашид анхаарах асуудлын талаар танилцууллаа.
Шалгалтын ажлын хэсэг шалгалтаар илэрсэн зөрчлүүдэд акт тогтоон, хууль тогтоомжийн хүрээнд хариу арга хэмжээ авч ажилласан байна. Цаашид тэтгэвэр, тэтгэмж, ажилгүйдлийн даатгалын сангуудын зарцуулалтад онцгойлон анхаарах, тавих хяналтыг улам сайжруулах, нийгмийн даатгалын сангийн үйл ажиллагааг нээлттэй ил тод болгох шаардлагатай байгааг Нийгмийн даатгалын ерөнхий газрын дарга Б.Батжаргал онцоллоо.
Газрын даргын зөвлөлөөс Сайн дурын даатгалын хамралтыг нэмэгдүүлэх, шимтгэлийн авлагаа барагдуулах, төлөвлөгөөт хяналт, шалгалтаар илэрсэн зөрчлийг шуурхай арилгах, архивын өрөөг стандартын дагуу тохижуулах үүрэг өглөө.
