Нийгмийн даатгалын үйлчилгээг иргэд даатгуулагчдад хүртээмжтэй болгож, ойртуулах зорилгоор энэ онд Нийгмийн даатгалын байгууллагын нийт 11 нэгж /хэлтэс, тасаг/-ийн барилгыг шинэчлэхээр төлөвлөсөн. Энэ хүрээнд Сонгинохайрхан дүүргийн 7-р хороонд тасгийн барилга шинээр барихаар шийдвэрлэж, шав тавих ёслолын ажиллагааг 2015 оны 09-р сарын 09-ны өдөр зохион байгуулав. Ёслолын ажиллагаанд Монгол Улсын УИХ-ын гишүүн, Засгийн газрын гишүүн Хүн амын хөгжил нийгмийн хамгааллын сайд С.Эрдэнэ, Нийслэлийн Нийгмийн даатгалын газрын дарга Д.Золжаргал, Нийгмийн даатгалын ерөнхий газрын Тамгын газрын дарга Д.Мэндбаяр, СХД-ийн Засаг дарга М.Чинболд, ЗДТГ-ын дарга С.Мөнхчулуун, Нийгмийн Даатгалын Хэлтсийн дарга Н.Алтанцэцэг болон хамтран ажиллагч байгууллага, ажил олгогч, даатгуулагч иргэдийн төлөөлөл оролцсон юм.
Сонгинохайрхан дүүрэг нь хүн амын нягтаршил ихтэй, хамгийн олон хүн амтай дүүрэг бөгөөд нийт 65453 өрхийн 300000 гаруй иргэд оршин суудаг дүүрэг бөгөөд тус дүүргийн Нийгмийн Даатгалын Хэлтэс нь нийгмийн даатгалын тухай хууль тогтоомжийг дүүргийн нутаг дэвсгэрт хэрэгжүүлэн дүүргийн 32 хорооны 32000 тэтгэвэр авагч, 53220 даатгуулагчид нийт 277,5 мянган иргэдэд нийгмийн даатгалын үйлчилгээг хүргэж ажиллаж байна.
Уг тасгийн барилга ашиглалтанд орсноор Баянхошуу, Ханын материалын ойр орчмын нийт зургаан хорооны 50000 гаруй иргэдэд нийгмийн даатгалын бүх үйлчилгээг нэг цэгээс хүргэж, төрийн үйлчилгээ иргэдэд ойртох юм. Тасгийн барилгыг “Монгол дээвэр” ХХК барьж гүйцэтгэн 2015 оны 12 дугаар сард ашиглалтанд хүлээлгэн өгөх төлөвлөгөөтэй ажиллаж байна.
