“Солонгос-Японы тэтгэврийн даатгалын тогтолцоо сэдэвт семинар”-т Японы олон улсын хамтын ажиллагааны Жайка байгууллагын Монгол дахь суурин төлөөлөгчийн газрын урилгаар Нийгмийн даатгалын ерөнхий газрын албан хаагчид оролцлоо.

Хэлэлцүүлгийн үеэр Японы нийгмийн хамгааллын судалгааны хүрээлэнгийн Нийгмийн хамгааллын суурь онолын судалгааны дарга Сато “Зүүн Ази дахь Японы тогтолцооны онцлог” сэдвээр, БНСУ-ын Эрүүл мэнд нийгмийн асуудал эрхэлсэн хүрээлэнгийн Судалгааны албаны дарга Юн Сук Мён “Эдийн засгийн хамтын ажиллагаа, хөгжлийн байгууллагын орнуудын чиг хандлага, БНСУ-ын сургамжууд” сэдвээр тус тус илтгэл тависан.

Дэлхий дахинд Япон, Норвеги, Солонгос улсууд тэтгэврийн даатгалын тогтолцоо, хамрах хүрээ, сангийн нөөц хөрөнгөөрөө  тэргүүлдэг. Хүн ам зүйн хувьд насжилт өндөртэй эдгээр орнууд сангийн хөрөнгөө ямар менежментээр зохицуулж, хэтийн тооцоолол хэрхэн хийж, шимтгэлийн орлого цуглуулах, инновацид суурилсан цахим үйлчилгээг хэрхэн нэвтрүүлж байгаа талаар мэдээлэл өгснөөрөө ач холбогдолтой хэлэлцүүлэг болсон юм.

Монгол Улсын Нийгмийн даатгалын байгууллагыг төлөөлж НДЕГ-ын дарга Г.Саран хэлсэн үгэндээ “Манай байгууллага нь дээрх улсуудын нийгмийн хамгаалал, тэтгэврийн даатгалын холбогдох байгууллагуудтай олон жил хамтран ажиллаж, туршлага судлан, техникийн хамтын ажиллагааны төсөл хөтөлбөрүүд хэрэгжүүлж ирсэн. Цаашид Япон улсаас актуар тооцоолол, Солонгос улсаас мэдээллийн технологийн сайн туршлагуудыг судлан хэрэгжүүлэх, хүний нөөцөө чадавхжуулах чиглэлд хамтран ажиллах хүсэлтэй байгаагаа” энэ үеэр уламжилсан.