Нийгмийн даатгалын багц хуулийг 2024 оны 01 дүгээр сарын 01-ний өдрөөс эхлэн мөрдөж байгаатай холбогдуулан аймаг, дүүрэг, сумын Засаг даргын Тамгын газрын дэргэдэх “Даатгуулагчийн малчнаар ажиллаж, нийгмийн даатгалын шимтгэл төлсөн хугацааг тодорхойлох орон тооны бус зөвлөл” эрх зүйн зохицуулалтгүй болсон тул уг зөвлөлийн дүрмийг Хөдөлмөр, нийгмийн хамгааллын сайдын 2024 оны “Тушаал хүчингүй болгох тухай” А/20 дугаар тушаалаар хүчингүй болгосон.
Даатгуулагчийн малчнаар ажиллаж, нийгмийн даатгалын шимтгэл төлсөн хугацааг тодорхойлж байсан малчны зөвлөлийн чиг үүргийг Нийгмийн даатгалын ерөнхий хуулийн 37.8-д заасны дагуу аймаг, дүүргийн Нийгмийн даатгалын газрын дэргэдэх Маргаан хянан шийдвэрлэх зөвлөлөөр хэлэлцэж байгаатай холбогдуулан “Даатгуулагчид малчны нөхцөлөөр өндөр насны тэтгэвэр тогтооход баримтлах заавар”-ын төслийг боловсруулж, олон нийтээс санал авахаар танилцуулж байна.
Уг зааврын төсөлтэй холбоотой саналыг тус цахим хуудасны “Санал хүсэлт” хэсгээр 2024 оны 06 дугаар сарын 25-ны дотор хүлээн авна.
