БАЯНЗҮРХ ДҮҮРЭГТ АЖИЛЛАЛАА
Нийгмийн даатгалын ерөнхий газрын даргын баталсан удирдамжийн дагуу Шимтгэл хураалт, Удирдлага арга зүйн газрын даргаар ахлуулсан ажлын хэсэг дүүргүүдэд ажиллаж байна.
Даатгуулагчдаас Нийгмийн даатгалын байгууллагад хандан ажил олгогчдын төлөх үүрэгтэй нийгмийн даатгалын шимтгэлийг цаг хугацаанд нь төлүүлж байх, үүссэн өр авлагыг барагдуулах талаар холбогдох хуульд заасан арга хэмжээ авах асуудлаар гомдол хүсэлтүүд ирдэг.
Иймд тус ажлын хэсэг дүүргүүдэд ажиллах хугацаандаа Нийгмийн даатгалын шимтгэл төлөгч аж ахуйн нэгжүүдийн удирдлагад нийгмийн даатгалын ерөнхий хуульд заасан эрх үүргийг танилцуулах, даатгуулагчдын эрх ашгийг хамгаалах, тэдэнд учирч болох эрсдэлийн талаар ойлголт өгөх зорилготой ажиллаж байна.
Ажил олгогчид цаг хугацаандаа төлөөгүйгээс даатгуулагчдын шимтгэл төлж ажилласан хугацаа нь тооцогдохгүй болох, шимтгэл төлөлтийг цалин, орлогын шалгуур үзүүлэлт болгон зээл олгодог банк, бусад байгууллага, гадаад улсаас суугаа элчин сайдын яамны визийн шалгуурт тэнцэхгүй болох зэрэг эрсдэл үүссээр байна.
Нийгмийн даатгалын ерөнхий газраас үүссэн өр, авлагыг барагдуулах ажлыг эрчимжүүлэх, байцаагч ажилтнуудыг мэргэжил арга зүйгээр хангах, ажил олгогчдод хууль сурталчлан таниулах ажлуудыг газар дээр нь зохион байгуулан ажиллаж байгаа нь тодорхой үр дүнд хүрч байна.
