Нийгмийн даатгалын ерөнхий газраас 9 дүгээр сарыг “Нээлттэй мэдээллийн сар” болгон зарлаж, ажил олгогч, иргэд, даатгуулагчдад нийгмийн даатгалын хууль тогтоомжийг сурталчлах, зөвлөн туслах замаар хамралтыг нэмэгдүүлэх чиглэлээр анхааран ажиллаж байна.
Өнөөдөр буюу 2024 оны 09 дүгээр сарын 20-ны өдөр 21 аймгийн төв, 98 сум, 9 дүүргийн нийт 128 байршилд “Нээлттэй хаалганы өдөрлөг”, “Явуулын үйлчилгээ”-г зохион байгуулж байна.
Уг арга хэмжээний үеэр нийгмийн даатгалын хууль тогтоомж, цахим үйлчилгээний талаар мэдээлэл өгөхөөс гадна иргэдийг сайн дурын даатгалд шинээр хамруулах, гэрээ байгуулах, хугацааг сунгах, шимтгэл төлүүлэх, тэтгэвэр, тэтгэмж тогтоох, ажилласан хугацааг тооцох, иргэн хүсэлтээ цахимаар хэрхэн илгээх талаар зөвлөж, иргэдийн утсанд “Нийгмийн даатгал” аппликэйшний 2.0 шинэчилсэн хувилбарыг суулгаж, тэдний сонирхсон асуултад тайлбар, хариулт өгч ажиллана.
