Хүндэт даатгуулагч, ажил олгогч, хамтран ажиллагч түншүүд, нийгмийн даатгалын салбарын ахмадууд, үе үеийн албан хаагч Та бүхэндээ Тулгар төрийн 2232, Их Монгол Улсын 817, Үндэсний эрх чөлөө, тусгаар тогтнолоо сэргээн мандуулсны 112, Ардын хувьсгалын 102 жилийн ой, Үндэсний их баяр наадмын мэндчилгээ дэвшүүлье.
Нийгмийн даатгалын байгууллага 2023 оныг “Нийгмийн даатгалын шинэчлэл”-ийн жилээр зарлан, цахим үйлчилгээний хүрээг нэмэгдүүлэх, нийгмийн даатгалын хууль тогтоомжийн хэрэгжилтийг зохион байгуулж байна. Тухайлбал, 2023 онын эхний хагас жилийн байдлаар 54.4 мянган ажил олгогч, 1.1 сая иргэнийг нийгмийн даатгалд хамруулан, 616.5 мянган даатгуулагчийн тэтгэвэр, тэтгэмж, төлбөр, зардалд 1.8 их наяд төгрөг олголоо. Энэ нь өмнөх оны мөн үетэй харьцуулахад даатгуулагчдын тоо 3.0 хувь, ажил олгогчдын тоо 5.1 хувь, тэтгэвэр авагчдын тоо 3.7 хувь, нийт тэтгэвэр, тэтгэмж, төлбөр авагчдын тоо 1.2 хувь, орлого 29.8 хувиар, зарлага 12.2 хувиар тус тус өссөн байна.
Засгийн газрын шийдвэрийн дагуу 2022 он суурьтай цалинд хэрэглэх шинэ итгэлцүүрийг баримтлан 488,098 тэтгэвэр авагчийн тэтгэврийг өөрчлөн бодож, нийгмийн даатгалын сангаас олгох тэтгэврийн хэмжээг нэмэгдүүлэх шийдвэрийн хэрэгжилтийг амжилттай зохион байгуулав.
Засгийн газраас өргөн барьсан Нийгмийн даатгалын багц хуулийн шинэчилсэн найруулгын төслийг Улсын Их Хурлын хаврын чуулганаар хэлэлцэн Үндэсний их баяр наадмын өмнө буюу 2023 оны 7 дугаар сарын 7-ны өдөр баталснаар хуваарилалтын зарчмаас хуримтлалын тогтолцоонд үе шаттайгаар шилжих, нийгмийн даатгалын харилцааг зөвхөн нийгмийн даатгалын хууль тогтоомжоор зохицуулах, нийгмийн даатгалын сангийн чөлөөт үлдэгдлийг санхүүгийн найдвартай хэрэгсэлд оруулах, нэмэгдүүлэх, даатгуулагчийн нэрийн дансны хийсвэр бичилтийг мөнгөжүүлэх, даатгуулагч өөрийн мөнгийг санхүүгийн хэрэгсэлд оруулах сонголтоо хийх, мөнгөжүүлсэн орлогыг нь өвлүүлэх, Хуримтлалын нэгдсэн сангийн хуулийн хүрээнд мөнгөжүүлсэн орлогоо ипотек, эрүүл мэнд, боловсролын зардалдаа ашиглах боломж бүрдэх, олон жил шимтгэл төлж ажилласан даатгуулагч илүү өндөр тэтгэвэр авдаг байх, даатгуулагч дараалсан 5 жилийн дундаж цалингаас тэтгэврээ тогтоолгох, тэтгэврийг инфляцийн түвшинтэй уялдуулан жил бүрийн 1 дүгээр сараас нэмэгдүүлэх, даатгуулагч тэтгэмж авах нөхцөлийг зөөлрүүлэх, тэтгэмжийн хэмжээ нэмэгдэх, ажил олгогчид шимтгэлийн хөнгөлөлт үзүүлэх, хөнгөлөлтийн хувь хэмжээг нэмэгдүүлсэн даатгуулагчид, залуучууд, тэтгэвэр авагчдад ээлтэй тогтолцооны шинэчлэл боллоо.
БӨХ НЬ ХҮЧТЭЙ, МОРЬ НЬ ХУРДАН, СУМ НЬ МЭРГЭН ХОТОЛ ОЛНООРОО САЙХАН НААДААРАЙ.
Хүндэтгэсэн,
Нийгмийн даатгалын ерөнхий газрын даргын албан үүргийг түр орлон гүйцэтгэгч
Цэнд-Аюушийн Ганцэцэг
