Арван долдугаар жарны “Үзэсгэлэн болгогч” хэмээх харагчин туулай жилийн сар шинийн мэндийг нийт даатгуулагч, тэтгэвэр авагч, ажил олгогч, хамтран ажилладаг байгууллага, нийгмийн даатгалын салбарын ахмадууд, үе үеийн албан хаагч Та бүхэндээ дэвшүүлье.

Нийгмийн даатгалын байгууллага нь 2022 онд 55.1 мянган ажил олгогч, 1.3 сая иргэнийг нийгмийн даатгалд хамруулан, орлогын төлөвлөгөөг 106.0 хувиар биелүүлж, 749.1 мянган даатгуулагчийн тэтгэвэр, тэтгэмж, төлбөр, зардалд 3.3 их наяд төгрөг олголоо. Нийгмийн даатгалын шимтгэлээ өөрөө хариуцан төлсөн зарим даатгуулагчийн шимтгэлийн 50 хувийг буцаан олгох тухай хууль, Засгийн газрын нийгмийн даатгалын сангаас олгох тэтгэврийн хэмжээг нэмэгдүүлэх шийдвэрийн хэрэгжилтийг зохион байгуулав. Түүнчлэн, Монгол Улсад нийгмийн даатгалын байгууллага үүсэж, хөгжсөний түүхт 80 жилийн ой тохиож, салбарын хэмжээнд үйл ажиллагааны үр дүнгээ олон нийтэд тайлагналаа.

Бид 2023 оныг “Нийгмийн даатгалын шинэчлэл”-ийн жилээр зарлан, цахим үйлчилгээний хүрээг нэмэгдүүлэх, мэдээллийн системийн шинэчлэлийг бүрэн дуусгах зорилт тавьж байна.

Засгийн газраас өргөн барьсан нийгмийн даатгалын багц хуулийн шинэчилсэн найруулгын төслийг Улсын Их Хурлын хаврын чуулганаар хэлэлцэхээр шийдвэрлэсний дагуу нийгмийн даатгалын багц хуулийн төслийг олон нийтээр хэлэлцүүлж байна. Нийгмийн даатгалын хуваарилалтын тогтолцооноос хуримтлалын тогтолцоо руу үе шаттайгаар шилжих бодлогын хүрээнд багц хуулийн төслийг Улсын Их Хурлаар баталснаар сангуудын тогтвортой, бие даасан, найдвартай байдлыг хангасан байх, тэтгэвэр, тэтгэмж, төлбөр нь даатгуулагчийн шимтгэл төлсөн хугацаа, төлсөн шимтгэлийн хэмжээтэй уялдаатай байх, даатгуулагчид, залуучууд, тэтгэвэр авагчдад ээлтэй тогтолцооны шинэчлэл болно гэдэгт итгэлтэй байна.

Та бүхэн элгээрээ энх амгалан, төрлөөрөө түвшин сайхан шинэлээрэй.

 

Хүндэтгэсэн,

Нийгмийн даатгалын ерөнхий газрын даргын албан үүргийг түр орлон гүйцэтгэгч

Цэнд-Аюушийн Ганцэцэг